কামিহাড়ৰ আঘাতক অৱহেলা নকৰিব

চমু বিৱৰণ

পথ দুৰ্ঘটনাত পতিত হ’লে বা আন যিকোনো দুৰ্ঘটনাত আমি বুকুত আঘাত পোৱাৰ সম্ভাৱনা থাকে| বুকুৰ আঘাতৰ বাবে চিকিৎসা কৰাৰ পিছত সকলো ঠিক-ঠাক হোৱাৰ পিছতো কিন্তু কেতিয়াবা কামিহাড়বোৰ বিষাই থাকে| মটৰ চাইকেল বা স্কুটাৰ চলাই গৈ থকা মানুহ এজন দুৰ্ঘটনাত বাগৰি পৰিল আৰু কামিহাড় ভাগি থাকিল| এই দুৰ্ঘটনাৰ পিছত চিকিৎসাৰ জৰিয়তে মানুহজনৰ জীৱন ৰক্ষা পৰিল, কিন্তু উশাহ-নিশাহ লোৱাৰ সময়ত বুকুৰ বিষ থাকি গ’ল| গাড়ী এখন চলাই থকাৰ সময়ত দূৰ্ঘটনাত পতিত হ’লে ষ্টীয়াৰিং হুইলৰ লগত পোনপটীয়াকৈ খুন্দা লাগিলে কেতিয়াবা বুকুৰ বিষৰ সৈতে উশাহ-নিশাহ লোৱাত কষ্ট অনুভৱ হয়| পথ দুৰ্ঘটনাত পতিত হোৱাৰ পিছত বুকুৰ আঘাত আৰু কামিহাড় ভগাৰ বাবে চিকিৎসাধীন হোৱাৰ পিছত লোক এজনক কেইদিনমান পিছত হাস্পতালৰ পৰা যাবলৈ দিয়া হ’ল| মানুহজনক হাস্পতালৰ পৰা যাবলৈ দিয়া হ’ল যদিও কেইদিনমান পিছত তেওঁৰ জ্বৰ, বুকুৰ বিষ আৰু উশাহ-নিশাহত কষ্ট অনুভৱ হ’বলৈ ধৰিলে| এনে সকলো পৰিস্থিতিত লোক এজনে সময় নষ্ট নকৰি অনতিবিলম্বে হৃদৰোগ বিশেষজ্ঞৰ পৰামৰ্শ লোৱা উচিত| অন্যথা তেওঁ গুৰুতৰ জটিলতাৰ সম্মুখীন হ’বলগা হ’ব পাৰে, যিটো অতি বিপজ্জনক হ’ব পাৰে|

বৰ্তমান সময়ত দ্ৰুত উদ্যোগী কৰণৰ লগে লগে অধিকৰ পৰা অধিকতৰ সংখ্যক লোক এন্দুৰ দৌৰত নামি পৰিছে| ডাঙৰ চহৰ-মহানগৰবোৰত ঘৰভাৰা বেছি হোৱা বাবে মানুহে কাষৰীয়া সৰু চহৰত থাকি জীৱিকাৰ বাবে প্ৰতিদিনে বৃহৎ চহৰলৈ অহা-যোৱা কৰে| ইয়াৰ ফলত এনে লোক এজনে প্ৰতিদিনে এঘণ্টাৰ পৰা ৫ ঘণ্টা পৰ্যন্ত যান-বাহনত কটাবলগা হয়| এনে ধৰণৰ ব্যস্ততাপূৰ্ণ জীৱনৰ বাবে পথত চলাচল কৰা যান-বাহনৰ সংখ্যা দ্ৰুতগতিত বৃদ্ধি পাইছে| যান-বাহনৰ এই সংখ্যা বৃদ্ধিয়ে পথ দুৰ্ঘটনাৰ সংখ্যাও কেইবাগুণে বৃদ্ধি কৰিছে|

পথ দুৰ্ঘটনা কিয় বিপজ্জনক

দেখা গৈছে যে গুৰুতৰ পথ দুৰ্ঘটনাত পতিত লোক এজন উপযুক্ত হাস্পতাল পোৱাৰ পূৰ্বেই মৃত্যুমুখত পৰে| অধিকাংশ পথ দূৰ্ঘটনাতে ঘটনাস্থলীতে দূৰ্ঘটনাত পতিত লোক এজনৰ মৃত্যুৰ কাৰণ হৈছে বুকুত পোৱা আঘাত| পথ দুৰ্ঘটনাৰ ফলত হোৱা মৃত্যুৰ ঘটনাৰ ৭৫ শতাংশৰ ক্ষেত্ৰতে বুকুত পোৱা আঘাতে প্ৰত্যক্ষ বা পৰোক্ষ ভূমিকা পালন কৰে| সেইবাবে বুকুত পোৱা আঘাতক কেতিয়াও অৱহেলা কৰিব নালাগে আৰু চিকিৎসাৰ ক্ষেত্ৰত বিলম্ব কৰিব নালাগে| অন্যথা মৃত্যু অৱধাৰিত হৈ পৰিব পাৰে|

আমাৰ দেশত জৰুৰী সেৱা প্ৰদানৰ মান অতি দুৰ্বল| পথ দুৰ্ঘটনাত পতিত লোক এজনক উপযুক্ত হাস্পতাললৈ নিৰাপদে পৰিবহন কৰাৰ বাবে সঠিক ব্যৱস্থাও নাই| তেনেদৰে দুৰ্ঘটনাস্থলীৰ পৰা আহত লোক এজনক আৰু অধিক ক্ষতি নোহোৱাকৈ উপযুক্ত হাস্পতাললৈ নিয়াৰ বাবে স্বাস্থ্যকৰ্মীৰ যেনে ধৰণৰ প্ৰশিক্ষণ লাগে আমাৰ দেশত সেয়াও নাই| দেখা গৈছে যে আমাৰ দেশত দূৰ্ঘটনাত আহত লোক এজনক হাস্পতাললৈ লৈ যোৱা ব্যৱস্থাটোৰ ক্ৰুটিৰ বাবেই পৰিবহনৰ সময়ত তেওঁৰ ক্ষতি বেছিহে হয়|

কামিহাড় ভগাটো কিয় বিপজ্জনক হ’ব পাৰে?

৭০ শতাংশ বুকুৰ আঘাততে কামিহাড় ভগাৰ লগতে বুকুৰ মাংসপেশীৰো ক্ষতি হয়| কামিহাড় ভাগিলে ৫০ শতাংশৰ ক্ষেত্ৰত আকৌ কামিহাড়ৰ তলতে থকা হাওঁফাওঁৰ গুৰুতৰ ক্ষতি হয়| ফলস্বৰুপে বুকুত থকা খোৰোঙত বায়ু আৰু তেজ জমা হয়| চিকিৎসা বিজ্ঞানৰ ভাষাত এনেদৰে বায়ু জমা হোৱাটোক নিউম’থ’ৰাক্স আৰু তেজ জমা হোৱাটোক ‘হেমোথ’ৰাক্স’ বুলি কোৱা হয়| এই দুয়োটা ক্ষেত্ৰতে যদি অনতিবিলম্বে আৰু জৰুৰীভাৱে চিকিৎসা প্ৰদান কৰা নহয় তেন্তে ৮০ শতাংশৰ ক্ষেত্ৰতে মৃত্যুৰ আশংকা থাকে| সেইবাবে বুকুত আঘাত পালে তাৎক্ষণিকভাৱে অভিজ্ঞ চিকিৎসকৰ পৰামৰ্শ লৈ চিকিৎসা গ্ৰহণ কৰা দৰকাৰ| অন্যথা মৃত্যুক হাত বাউলি দি মতাৰ দৰে হ’ব|

কেতিয়াবা পথ দুৰ্ঘটনাত কেইবাডালো কামিহাড় একে সময়তে বুকুৰ বিভিন্ন অংশত ভাগে| চিকিৎসা বিজ্ঞানৰ ভাষাত ইয়াক ‘ফ্লেইল চেষ্ট’ বা ‘ছুইঙিং

চেষ্ট’ বুলি কোৱা হয়| শ্বাস-প্ৰশ্বাসৰ সময়ত ফ্লেইল চেষ্ট অংশটো বুকুৰ প্ৰকৃত উঠা-নমাৰ লগত সংগতি ৰাখি উঠা-নমা নকৰে আৰু ই পৃথকে নিজাকৈ উঠা-নমা কৰে| এই স্বতন্ত্ৰ ফ্লেইল চেষ্ট অংশটোৱে বুকুৰ বাকী অংশৰ লগত সহযোগিতা নকৰে, বৰং ই বিপৰীতেহে কাম কৰে| ই হৈছে অতি বিপজ্জনক পৰিস্থিতি| কিয়নো ফ্লেইল চেষ্ট এ উশাহ-নিশাহ লোৱা ব্যৱস্থাটো আৰু বুকুৰ অন্যান্য কাম-কাজত গুৰুতৰভাৱে ব্যাঘাত জন্মায়| এই দুয়োটা কাৰ্যৰ একত্ৰিত প্ৰভাৱত তেজত অক্সিজেনৰ পৰিমাণ দ্ৰুতগতিত হ্ৰাস পায়| ফ্লেইল চেষ্টৰ চিকিৎসা সময়ত সঠিক ভাৱে নকৰিলে অচিৰেই হওক বা বিলম্বিতভাৱেই হওক, মৃত্যু অনিবাৰ্য| এনে পৰিস্থিতিত আক্ৰান্ত ব্যক্তিজনক সকলো সা-সুবিধাযুক্ত আধুনিক হাস্পতালত ভৰ্তি কৰাব লাগে, য’ত অভিজ্ঞ চিকিৎসক উপলব্ধ|

ভগা কামিহাড়ৰ বিপদ:

ভগা কামিহাড়ৰ সঠিক চিকিৎসা ন’হলে, অচিৰেই হওক বা বিলম্বিতভাৱেই হওক মৃত্যু অনিবাৰ্য হৈ পৰে| বহু সময়ত মানুহে কামিহাড় ভাগিলে গুৰুত্বসহকাৰে নলয়| তেওঁলোকে ইয়াক সাধাৰণ আঘাত বুলি ভাবে| বহু সময়ত চিকিৎসকেও কামিহাড় ভগা আঘাতক প্ৰয়োজনীয় গুৰুত্ব নিদিয়ে| ভাৰতত সাধাৰণতে মানুহে অকল কামিহাড় ভগা কথাটোতে গুৰুত্ব দিয়ে আৰু সেয়ে তেওঁলোকে ইয়াৰ চিকিৎসাৰ বাবে অস্থিৰোগ বিশেষজ্ঞৰ ওচৰ চাপে| মানুহে এইটো উপলব্ধি নকৰে যে দুৰ্ঘটনাত কামিহাড় ভাগিলে ইয়াৰ তলতে থকা হাওঁফাঁও আঘাতপ্ৰাপ্ত হ’ব| ফলস্বৰুপে ভগা কামিহাড়ৰ চিকিৎসাত বেছি গুৰুত্ব দিয়া হয় আৰু বুকুৰ আঘাতৰ চিকিৎসাৰ সময়ত ইতিমধ্যে ক্ষতি হোৱা হাওঁফাঁওক সম্পূৰ্ণৰুপে অৱহেলা কৰা হয়| যেতিয়া এই ভুল ধৰা পৰে, তেতিয়ালৈ বহু পলম হৈ যায়| ইতিমধ্যে কামিহাড় ভগা লোকসকল শ্বাস-প্ৰশ্বাসজনিত গুৰুতৰ সমস্যা এটাৰ বলি হয়, ইয়াক কোৱা হয় একিউট ৰেছপিৰেটৰী ডিষ্ট্ৰেছ ছীণ্ড্ৰম| এনে জটিলটাৰ সৃষ্টি হ’লে প্ৰাণৰক্ষাৰ সম্ভাৱনা মাথো পাঁচ শতাংশ| এনে পৰিস্থিতিত শ্বাস-প্ৰশ্বাস আৰু অক্সিজেনৰ যোগান প্ৰক্ৰিয়া গুৰুতৰভাৱে বাধাগ্ৰস্ত হয় আৰু শৰীৰত অক্সিজেনৰ মাত্ৰা বিপজ্জনকভাৱে কমি যোৱাৰ লগতে কাৰ্বন-ডাই অক্সাইডৰ মাত্ৰা বাঢ়ি যায়| এনে জটিলতাত আক্ৰান্ত ব্যক্তিৰ বিভিন্ন গুৰুত্বপূৰ্ণ অংগ, যেনে-বৃক্ক, মগজু আৰু যকৃতে কাম কৰিবলৈ এৰি দিয়ে| এনে সময়ত বুকুৰ এক্স-ৰে কৰিলে সি বগা আৰু অস্পষ্ট হয়| এনে ধৰণৰ বিপজ্জনক জটিলতা এৰাই চলাৰ বাবে বুকুত আঘাত পালে আৰম্ভণিৰ পৰাই গুৰুত্বসহকাৰে ল’ব লাগে যাতে এ আৰ ডি এছৰ দৰে সমস্যা সৃষ্টি হ’ব নোৱাৰে|

কামিহাড় কেতিয়া ভাগিব পাৰে:

দুচকীয়া যান-বাহন চলাওঁতে সতৰ্ক থকা ভাল| এনে বাহন দুৰ্ঘটনাত পতিত হ’লে কামিহাড় ভগাটো ডাঙৰ কথা নহয়| ওখ ঠাইৰ পৰা তললৈ পৰিলেও কামিহাড় ভাগিব পাৰে| ছিটবেল্ট নবন্ধাকৈ গাড়ী চলালে দুৰ্ঘটনাৰ উপৰি হঠাতে ব্ৰেক ব্যৱহাৰ কৰিলেও ষ্টীয়াৰিং হুইলত খুন্দা লাগিব পাৰে| ফলস্বৰুপে বুকুৰ এফালৰ বা দুয়োফালৰ কামিহাড় ভাগিব পাৰে| তেনেদৰে খন্তেকতে লগা কাজিয়া, কোনো প্ৰতিবাদী কাৰ্যসূচীৰ সময়ত হোৱা লাঠীচালনা আদিৰ পৰাও কামিহাড় ভগাৰ দৰে ঘটনা ঘটিব পাৰে|

কামিহাড় ভাগিলে কি কৰিব:

কামিহাড় ভগা বুলি সামান্যতম সন্দেহো হ’লে তাৎক্ষণিকভাৱে এজন অভিজ্ঞ চিকিৎসকৰ পৰামৰ্শ লওক| তদুপৰি বুকুৰ এক্স-ৰে কৰাবও লাগে| বুকুৰ এখন সাধাৰণ এক্স-ৰেৰ যোগেদি কম খৰচতে এনে আঘাতৰ উপযুক্ত চিকিৎসা পদ্ধতি নিৰ্ধাৰণ কৰাত সহায়ক হয় আৰু এজন আঘাতপ্ৰাপ্ত ব্যক্তিৰ জীৱন ৰক্ষা কৰিব পাৰি| বুকুত পোৱা সামান্য আঘাতৰ পিছতে অসহ্যকৰ বিষ অনুভৱ আৰু লগে লগে মৃত্যুৰ দৰে ঘটনা সদায় নঘটে| দেখা গৈছে যে আঘাতপ্ৰাপ্ত ব্যক্তি এজনে কামিহাড় ভগাৰ পিছত প্ৰাৰম্ভিক অৱস্থাত অসহ্যকৰ বিষ আৰু অসুবিধা অনুভৱ নকৰে| কিন্তু এসপ্তাহ পিছত বা তাৰ পিছত বুকুৰ গুৰুতৰ জটিলতা আহিব পাৰে আৰু মৃত্যুও হ’ব পাৰে| সেইবাবে যিমানেই সাধাৰণ যেন অনুভৱ নহওক কিয় কামিহাড়ত আঘাত পালে অৱহেলা কৰিব নালাগে| আমাৰ দেশত কামিহাড় ভাগিলে মানুহে সাধাৰণতে অস্থি ৰোগ বিশেষজ্ঞৰ ওচৰ চাপে| এই অজ্ঞতাই তিনি ধৰণে ক্ষতি কৰে| প্ৰথমতে, তেওঁলোকে গুৰুত্বপুৰ্ণ সময় নষ্ট কৰে, যিখিনি সময় সফল চিকিৎসাৰ বাবে ব্যৱহাৰ কৰিব পৰা গ’লহেঁতেন| দ্বিতীয়তে, আঘাতপ্ৰাপ্ত হাঁওফাঁওৰ প্ৰকৃত অৱস্থা নিৰুপণ অসম্ভৱ হয়| তৃতীয়তে, কামিহাড় ভগাৰ পৰা হোৱা বিষ-যন্ত্ৰণা লাঘৱ কৰাৰ বাবে কাপোৰ, বেল্ট আদি বুকুত ভুলকৈ ব্যৱহাৰ কৰা হয়| কেতিয়াবা বুকুৰ ওপৰতে প্লাষ্টাৰ লগোৱা হয়| এনেদৰে বুকুৰ ওপৰত চাপ দিয়াৰ পৰা পিছে ভালতকৈ বেয়াহে বেছিকৈ হয়| এই বাহিৰা চাপৰ বাহিৰে আঘাত পোৱা হাঁওফাঁও সম্পুৰ্ণৰুপে ফুলি উঠিব নোৱাৰে| ফলস্বৰুপে ই কোঁচ খাই যায় নাইবা ইয়াত সংক্ৰমণ ঘটে| ইয়াৰ পৰা গৈ শ্বাস-প্ৰশ্বাস জনিত সমস্যাৰ সৃষ্টি হয় আৰু অৱশেষত ই জীৱনলৈও ভাবুকি আনিব পাৰে|

কেনেদৰে জানিব পাৰি:

• কোনো দুৰ্ঘটনাৰ পিছত বুকুৰ যিকোনো অংশত বিষালে|
• স্কুটাৰ, মটৰ চাইকেলৰ পৰা বা কোনো ওখ ঠাইৰ পৰা তলত পৰাৰ পিছত যদি উশাহ-নিশাহ লোৱাৰ সময়ত বুকুত অসহ্যকৰ বিষ অনুভৱ হ’লে|
• পথ দুৰ্ঘটনাৰ পিছত শ্বাস-প্ৰশ্বাসত অসুবিধা আৰু বুকুত অসহ্যকৰ বিষ অনুভৱ হ’লে|
• পথ দুৰ্ঘটনাত পতিত হোৱাৰ পিছত উশাহ-নিশাহ বন্ধ হৈ যোৱাৰ দৰে অনুভৱ হ’লে|

কেনেদৰে প্ৰতিৰোধ কৰিব পাৰি?

কামিহাড় ভগাটো ৰোধ কৰিবলৈ গাড়ী-মটৰ চলোৱাৰ সময়ত ছিটবেল্ট ব্যৱহাৰ কৰিব লাগে| এটা পৰিসংখ্যা অনুসৰি ছিটবেল্ট ব্যৱহাৰ কৰাৰ দ্বাৰা পথ দুৰ্ঘটনাৰ ফলত মৃত্যু ৪৫ ৰ পৰা ৫০ শতাংশ হ্ৰাস কৰিব পাৰি| দুচকীয়া বাহনত হেলমেটে বাহনত যেনেদৰে চালকক সুৰক্ষা দিয়ে, গাড়ী-মটৰৰ ক্ষেত্ৰতো ছিটবেল্টে চালকৰ বাবে জীৱন ৰক্ষাকাৰী হিচাপে কাম কৰে| সেইবাবে গাড়ী চলাওঁতে সদায় ছিটবেল্ট ব্যৱহাৰ কৰিব লাগে|

লেখক:- ডা: কে কে পাণ্ডে

উৎস:-দৈনিক অসম