চাকৰিৰ পৰা অৱসৰ লোৱাৰ পিচৰ দিনবোৰ কেনেদৰে অতিবাহিত কৰিব ?
চাকৰিৰ পৰা অৱসৰ লোৱাৰ পিচৰ দিনবোৰ কেনেদৰে অতিবাহিত কৰিব ?
আমাৰ মাজৰে বহুতৰ বাবে অৱসৰ শব্দটোৱে আজৰি আৰু শান্তিৰ এটা জীৱন
বুজায়৷পৰিয়ালৰ বাবে দায়িত্ব বহন কৰি আৰু আমাৰ ওপৰত নিৰ্ভৰশীলসকলৰ ভৱিষ্যত নিশ্চিত কৰি দীৰ্ঘ দিনৰ কঠোৰ পৰিশ্ৰমৰ পিচত , অৱসৰ বিনোদনৰ কামত মগ্ন হৈ,অপূৰ্ণ স্বপ্নবোৰ পূৰ্ণ কৰাত ব্যস্ত থাকি আমাৰ স্নেহভাজনসকলৰ সৈতে সময় অতিবাহিত কৰি জীৱন কটাবলৈ এইখিনি প্ৰকৃততে আমাৰ নিজৰ সময়৷ এয়া হল জীৱনৰ সেই মনোমোহা কাল, যেতিয়া সময় আপোনাৰ পক্ষত থাকে আৰু আপুনি দৈনন্দিন জুলুমবোৰৰ পৰা বহু নিলগত থাকে৷ যেইকি নহওক,আপুনি যদি আপোনাৰ স্বাস্থ্যৰ প্ৰতি মনোযোগী নহয় তেন্তে অৱসৰ এক সৰ্বনাশৰ কাৰণো হব পাৰে৷ বৃদ্ধ বয়সে অনিবাৰ্যভাৱে স্বাস্থ্যজনিত সমস্যা আনি দিয়ে আৰু গোটেই জীৱনটো পৰিপূৰ্ণভাৱে উপভোগ কৰিবলৈ হলে আপুনি আপোনাৰ স্বাস্থ্যৰ প্ৰতি ভালদৰে যত্ন লব লাগিব৷
আপুনি ওৰে জীৱন কঠোৰ পৰিশ্ৰম কৰি এইটো আশা কৰিছিল যে এনে এটা দিন আহিব যেতিয়া নেকি আপুনি ৰৌদ্ৰোজ্জল বুলনি ঘৰত বহি কিতাপ পঢ়ি সময় অতিবাহিত কৰাৰ বাদে একো কৰিব নালাগে৷ কিন্তু সেই দিনটোৰ আগমণ ঘটাৰ লগে লগে আপুনি পথভ্ৰষ্ট হৈ উদ্দেশ্য বিহীন আৰু বিচ্যুত অনুভৱ কৰিব৷ হঠাৎ আপুনি ধীৰ হৈ পৰিব নিবিচাৰে৷ আপুনি পুনৰ ঘূৰি গৈ হুৰামূৰা আৰম্ভ কৰি দিবলৈ ইচ্ছা কৰিব৷ যেইকি নহওক,আপুনি ভাৱে - আপুনি অৱসৰৰ বাবে প্ৰস্তুত , বাস্তৱটো বহুত পৃথক আৰু শূন্যতাবোধে বেয়াকৈ ছানি ধৰে৷ আপোনাৰ জীৱনৰ সেই কালছোৱাৰ কৰ্মময় বছৰবোৰত আপুনি উপাৰ্জন কৰিছিল,তেনে হোৱাৰ আৰু আশা নাই৷ আপুনি অনুভৱ কৰিবলৈ আৰম্ভ কৰিব যে এয়াই বৃদ্ধ বয়সৰ আৰম্ভণি আৰু ইয়াৰ পৰাই ই আওগৰীয়া৷ হতাশ নহব৷ এই ধৰণে চিন্তা কৰা ব্যক্তি কেৱল আপুনিয়েই নহয়৷ সৰহ ভাগ লোকেই অৱসৰৰ দিন চমু চাপি অহাৰ লগে লগে এনেদৰেই ভাৱিবলৈ আৰম্ভ কৰে৷
অৱসৰ গ্ৰহণ কৰা লোকৰ সংখ্যা দিনক দিনে বৃদ্ধি পাইছে আৰু স্বাস্থ্য ভালে থকা সত্বেও সৰহভাগ লোকে পুনৰ নিয়োগ লাভ কৰিব নোৱাৰে৷ এই সমস্যাটো বিশ্লেষন কৰিবৰ বাবে গভীৰতালৈ প্ৰবেশ কৰাৰ এইটো উপযুক্ত সময়৷ মুঠৰ ওপৰত এইটো আমাৰ জীৱন আৰু আমি নিজকে ব্যস্ত ৰাখিবলৈ আৰু মৃত্যু পৰ্যন্ত জীৱনটো উপভোগ কৰিবলৈ আহিলাসমূহ বিচাৰিব লাগে৷
দীৰ্ঘকাল ধৰি কৰ্মময় জীৱনত ব্যস্ত থাকি অৱসৰপ্ৰাপ্তসকলে অৱশেষত তেওঁলোকৰ সময়বোৰ কেনেদৰে ব্যয় কৰিব তাৰ ওপৰত সম্পূৰ্ণ নিয়ন্ত্ৰণ লাভ কৰে৷ পণ্ডিতসকলে অৱসৰপ্ৰাপ্তসকলৰ বাবে কিছুমান মনোগ্ৰাহী পৰামৰ্শ আগ বঢ়াইছে যাতে তেখেতসকলৰ শক্তি আৰু সামৰ্থ অনুযায়ী আগুৱাই যাব পাৰে৷ ফিল টেলৰে( Phil Tailor ) আগ বঢ়োৱা পঁচিশটা পৰামৰ্শ মন কৰকচোন৷
১)নিজৰ ধন সম্পত্তিৰ মাজতে জীৱন নিৰ্বাহ কৰক৷ আপুনি আপোনাৰ অৱসৰ আৰ্জন কৰিছে, এতিয়া ইয়াক টিকি থাকিবলৈ দিয়ক৷ যদি আপোনাৰ পেন্সনৰ পৰা মাহেকীয়া হিচাপে স্থায়ী উপাৰ্জন আছে, তেনেহলে আপোনাৰ সীমাৰ ভিতৰত আৱদ্ধ থকাকৈ আপুনি এখন বাজেট প্ৰস্তুত কৰাটো নিশ্চিত কৰিব লাগিব৷ যদি আপুনি সৰহকৈ সাঁচিবৰ বাবে থোৱা ধন ব্যয় কৰি আছে তেন্তে উপযুক্ত ধন উঠোৱা নিৰিখ আৰু প্ৰয়োগ হব পৰা কৰৰ নীতিৰ সন্ধান নিশ্চিত কৰক৷
২) পৃথিৱী ভ্ৰমণ কৰক৷ এতিয়া আপুনি বন্ধৰ বা ছুটিৰ সীমাবদ্ধতাৰ বাবে চিন্তাগ্ৰস্ত হবৰ দৰকাৰ নাই, বৰ্ধিত বন্ধ উপভোগ কৰক৷ কিছুদিনৰ বাবে বিদেশ ভ্ৰমণৰ বাবে ওলাওক বা এক দীঘলীয়া সমুদ্ৰ যাত্ৰা আৰম্ভ কৰক৷
৩) ঘৰলৈ এখন গাড়ী কিনি আনক৷ নতুন হওক বা পুৰণিয়েই হওক ঘৰলৈ এখন গাড়ী কিনি আনি ভ্ৰমণৰ বাবে আপোনাৰ বিছনা পাটী আৰু ৰান্ধনি-শালৰ বয় বস্তু লগত লওক৷ প্ৰতিখন জাতীয় উদ্যান বা আপোনাৰ ভাল লগা ঠাইৰ দৰ্শন কৰাৰ লক্ষ্য স্থিৰ কৰি লওক৷
৪) আপোনাৰ ঘৰটো নতুনকৈ সাজক৷ ঘৰটোৰ উন্নয়নৰ বাবে আপোনাৰ সময় ব্যৱহাৰ কৰক৷ আপোনাৰ ঘৰৰ সদস্যসকলক সংগঠিত কৰিলে এই কাম তেনেই সহজ হৈ পৰিব বা এক ওপৰঞ্চি ঠাইৰ সংযোজন ঘটাই এটা ডাঙৰ প্ৰকল্প হব৷ আপুনি এতিয়া সময় পাইছে৷ গতিকে নিজে পৰিবৰ্তন সাধন কৰিবলৈ শিকিব লাগে৷
৫)গাঁৱলৈ যাওক৷ আপুনি যান জঁট,হৈ-চৈৰ বাবে অতিষঠ হৈছে নেকি ? গাঁৱলৈ ওলাওক, যিহেতু আপোনাক আৰু এটা চাকৰি নালাগে, আপুনি যলৈ যাব খোজে তালৈকে যাব পাৰে৷ আপোনাৰ মুকলি ঠাইডোখৰত অৰ্কিডৰ বাগিছা খুলিব বা পশু পালন কৰিবও পাৰে৷
৬)নগৰলৈ গতি কৰক৷ আপুনি জীৱন ধাৰণৰ আৱশ্যকীয় বস্তুবোৰ নগৰৰ কেইটামান ব্লকতে পাব বিচাৰে নেকি ? নগৰলৈ যাওক৷ বসতি স্থাপন কৰি পৌৰসভাৰ সক্ৰিয় সদস্য হওক৷ তাত আপুনি কলা-সংস্কৃতিৰ চমৎকাৰ অভিজ্ঞতা লাভ কৰিব৷
৭) এটা ব্যৱসায় আৰম্ভ কৰক৷ এতিয়া আপোনাৰ কৰ্মজীৱনৰ সমাপ্তি ঘটিছে, এটা ব্যৱসায় আৰম্ভ কৰক- যিটো আপুনি সদায়ে বিচাৰি আহিছে৷ আপোনাৰ কৰ্মজীৱনৰ অভিজ্ঞতাবোৰ প্ৰয়োগ কৰি এক পৰামৰ্শদাতা প্ৰতিষ্ঠান আৰম্ভ কৰাৰ কথাও বিবেচনা কৰিব পাৰে বা আপোনাৰ বৰ্তমানৰ অংশকালিন ব্যৱসায়টো পূৰ্ণ পৰ্যায়ৰ ব্যৱসায়িক প্ৰতিষ্ঠানলৈ পৰিবৰ্তন কৰিব পাৰে৷
৮)এটা অংশকালিন চাকৰি লওক৷ আপুনি এতিয়াও এখন ঠাইলৈ সদায়ে গৈ থাকিব বিচাৰেনে ? আপুনি ভাল পোৱা কোম্পানী এটাত ভাল লগা অংশকালিন চাকৰি এটা বিচাৰি লওক৷ এই চাকৰি লৈ অলপ ওপৰঞ্চি উপাৰ্জন কৰাই নহয়,ই আপোনাক নিত্য সামাজিকৰণৰ এক স্থান প্ৰদান কৰিব৷
৯) আনক শিক্ষা দিয়ক৷ আপোনাৰ কষ্টোপাৰ্জিত দক্ষতা আৰু অভিজ্ঞতাবোৰ আনক শিক্ষা দিয়াত প্ৰয়োগ কৰক৷ স্থানীয় পুথিভঁৰাল বা কমিউনিটি ঘৰত এক বিনামূলীয়া পাঠদান সূচী আৰম্ভ কৰক৷ আপুনি স্থানীয় কলেজ বা বিশ্ববিদ্যালয়তো শিক্ষা দিয়াটো সম্ভৱ হব পাৰে৷
১০) স্বেচ্ছাসেৱক হওক৷ আপোনাৰ সময়বোৰ আনক সহায় কৰাত ব্যৱহাৰ কৰক৷ গীৰ্জাঘৰ,মঠ মন্দিৰ বা স্থানীয় জনহিতকৰ অনুষ্ঠানৰ সৈতে যোগাযোগ কৰি আপোনাৰ দক্ষতাৰ লগত খাপ খোৱা স্বেচ্ছাসেৱকৰ পদ পোৱাৰ সুযোগ বিচাৰি লওক৷ বিদেশৰ তেনে সুযোগ বিবেচনা কৰাৰ কথাও নাপাহৰিব৷
১১) ৰাইজৰ সেৱাত ব্ৰতী হওক৷ ৰাজনৈতিক পদ্ধতিত অংশ লৈ জাতিৰ তথা দেশৰ সেৱা কৰক৷ স্থানীয় জনপ্ৰতিনিধি বা বিদ্যালয় পৰিচালনা সমিটিৰ সভ্য হওক৷
১২)বন্ধুসকলৰ লগত সময় অতিবাহিত কৰক৷ আপোনাৰ অঞ্চলৰ অন্য অৱসৰপ্ৰাপ্ত ব্যক্তি সকলৰ বিষয়ে জানিবলৈ চেষ্টা কৰক৷
১৩)পৰিয়ালৰ লোকসকলক দেখা কৰক৷ ওচৰত থকা আৰু দূৰণিত থকা পৰিয়ালৰ লোকসকলক লগ পোৱাৰ বাবে অধিক সময় ব্যয় কৰক৷ শিপাৰ সন্ধান কৰক আৰু আপুনি কাহানিও নজনা আত্মীয়ক বিচাৰি উলিয়াওক৷
১৪)শিশু ওমলোৱা কাম কৰক৷ আপোনাৰ পৰিয়ালৰ বা স্থানীয় কোনো পৰিয়ালৰ শিশু ৰাখি দিয়াৰ আৱশ্যক হলে তেওঁলোকক সহায় কৰাৰ বাবে আপোনাৰ আজৰি সময় কামত লগাওক৷ তাৰ দ্বাৰা প্ৰয়োজন হলে ওপৰঞ্চি ধনো হাতলৈ আহিব৷
১৫)এজন বিজ্ঞ আৰু বিশ্বস্ত পৰামৰ্শদাতা হওক৷ পৰামৰ্শ দিবলৈ এজন যুৱক বিচাৰি লওক৷ এজন অভিজ্ঞ আৰু কৃতকাৰ্য ব্যক্তিৰ পৰা শিকাৰ সুযোগ পাই বহুতো যুৱক যুৱতীয়ে ভালেই পাব৷ কোনোবাজনৰ জীৱন সলনি কৰি দিবলৈ সপ্তাহত এটা সময় উলিয়াই লওক৷
১৬)শিক্ষিত হওক৷ বিদ্যালয়লৈ ঘূৰি যাওক৷ আপোনাৰ ডিপ্লোমা সমাপ্ত কৰক বা স্নাতক ডিগ্ৰী লওক৷ মনৰ আনন্দৰ বাবে আপোনাৰ ৰাপ থকা বিষয়ত পাঠদান গ্ৰহণ কৰিব পাৰে৷
১৭) পঢ়া শুনা কৰক৷ আপুনি আগতে পঢ়িবলৈ সময় নোপোৱা কিতাপবোৰ পঢ়ি দিন অতিবাহিত কৰক৷
১৮)এখন কিতাপ লিখক৷ কিতাপ লিখা কামে বহুত সময় লয়৷ আপোনাৰ হাতত এতিয়া বহুত সময় আছে৷ এখন উপন্যাস লিখক, ৰন্ধন প্ৰকৰণৰ ওপৰত এখন কিতাপ লিখক বা আপোনাৰ স্মৃতিবোৰ লিপিবদ্ধ কৰক৷
১৯) এটা ব্লগ আৰম্ভ কৰক৷ ব্লগৰ বিষয়ে শিকক আৰু আপোনাৰ অৱসৰৰ অভিজ্ঞতাবোৰ অনলাইনত কিছুমান ব্লগত ভাগ বটোৱাৰ কৰক৷ আপুনি আপোনাৰ ব্লগ আৰম্ভ কৰি আপোনাৰ অতীতৰ কাৰ্যকালৰ জ্ঞান বা আপোনাৰ যি চখ আছে তাক আনক জানিবলৈ দিয়ক৷
২০)এটা নতুন ভাষা শিকক৷ অৱসৰ গ্ৰহণৰ পিচত যদি বিদেশলৈ যোৱাৰ পৰিকল্পনা আছে তেন্তে সেই দেশৰ ভাষা শিকাত সময় কামত লগাওক৷ ই আপোনাৰ দীৰ্ঘ বন্ধক কামত লগাব আৰু মনক তীক্ষ্ন কৰি ৰাখিব৷
২১) বাদ্য যন্ত্ৰ বজাবলৈ শিকক৷ পিয়ানু, গীতাৰ, ঢোল,খোল, মৃদং বা আপুনি ভাল পোৱা বাদ্য যন্ত্ৰ বজাবলৈ প্ৰশিক্ষণ লওক আৰু তাক শিকক৷ আপোনাৰ নতুন সংগীতৰ পাৰদৰ্শিতাই অনাগত দিনত হব লগা সন্মিলনত পৰিয়ালৰ লোকসকলক প্ৰভাবান্বিত কৰিব৷
২২) এটা নতুন চখ বা হবি আৰম্ভ কৰক৷ এতিয়া আপোনাৰ ৰাপসমূহত সময় কটোৱাৰ দিন আহি পৰি্ছে৷ মাছ ধৰা,বাগান পতা, ছবি অঁকা,ফটোগ্ৰাফী কৰা আদিৰ দৰে এক নতুন চখ বা হবি নিৰ্বাচন কৰি লওক৷
২৩)নতুন এক ক্ৰীড়াত ধৰক৷ নতুন মল্লযুঁজ বিদ্যা অনুধাবনৰ প্ৰত্যাহ্বান কৰি সক্ৰিয় হৈ থাকক৷ বহুতো ব্যক্তিয়ে অৱসৰৰ পিচত মাৰাথান বা স্নোস্কি ভালদৰে সম্পন্ন কৰে৷
২৪) শৰীৰ চৰ্চা গোটত( Fitness Group) যোগদান কৰক৷ আপোনাৰ নতুন সক্ৰিয় জীৱন প্ৰণালীক ধৰি ৰাখিবলৈ অন্য লোকৰ দলত যোগদান কৰক-যিসকলে নিজৰ শাৰীৰিক যোগ্যতা বজাই ৰাখিবলৈ দায়বদ্ধ থাকে৷ আপোনাৰ জীৱনৰ আটাইতকৈ ভাল ৰূপটো পাবলৈ কাম কৰি যাওক৷
২৫) একো নাই৷ আপুনি আপোনাৰ অৱসৰ লাভ কৰিলে৷ একো নোহোৱাকে ধৰি আপুনি যি কৰিব বিচাৰে তাকে কৰি যাওক৷
সামৰণিত কব পাৰি যে নিয়োগকাৰীৰ অৱসৰপ্ৰাপ্তসকলৰ প্ৰতি থকা আন্তৰিকতা, কৰ্তব্যবোধ, দায়িত্বশীলতা আৰু সদিচ্ছাৰ ওপৰতহে অৱসৰপ্ৰাপ্ত ব্যক্তিসকলৰ মনোকামনাবোৰ সঠিক সময়ত সঠিকভাৱে পূৰ্ণ হোৱাটো নিৰ্ভৰ কৰে৷ নিয়োগকাৰীয়ে অৱসৰপ্ৰাপ্তসকলক সময়মতে প্ৰাপ্য ধন নিদিলে, পেন্সনৰ ব্যৱস্থা নকৰিলে অৱসৰৰ পিচত জ্যেষ্ঠ নাগৰিকসকলৰ অৱস্থা পানীত হাঁহ নচৰাৰ দৰে হয়৷ সেয়েহে চাকৰিৰ শেষত দিয়া নিৰ্দ্দিষ্ট পৰিমাণৰ ধন বা পাৰিতোষিক(Gratuity) মুকলি কৰি দিয়াৰ ক্ষেত্ৰত আইন অনুযায়ী (Payment of gratuity act,1972) কিছুমান চৰ্ত দিয়া হৈছে, যাতে অৱসৰপ্ৰাপ্তসকলৰ স্বাৰ্থ ৰক্ষা হয়৷ চৰ্ত অনুযায়ী(Section7(3)ৰ মতে)দিব লগা দিনৰ ৩০ দিনৰ ভিতৰতে গ্ৰেচুইটিৰ ধন আদায় দিব লাগিব৷ অন্যথাই নিয়োগকাৰীয়ে ১০% সুত ভৰিব লাগিব৷ আইন অমা্ন্যকাৰীৰ বাবে জেল জৰিমণাৰো ব্যৱস্থা কৰা হৈছে৷ ভাৰতবৰ্ষত বিশেষকৈ আমাৰ অসমত অৱসৰপ্ৰাপ্তসকলৰ অৰ্থনৈতিক নিশ্চয়তা নথকাৰ বাবে তেওঁলোকে বৃদ্ধ বয়সত মনোকষ্ট ভোগ কৰে৷ অবৈতনিকভাৱে শিক্ষকতা কৰি অৱসৰ লোৱাসকলৰ অৱস্থা অতিকৈ হৃদয় বিদাৰক হয়৷ বেতনভোগীসকলেও সংসাৰৰ জঞ্জালবোৰ মাৰি শেষ নহঁওতেই অৱসৰ গ্ৰহণ কৰিব লগা হোৱা বাবে তেওঁলোকৰ অৱস্থা নদীৰ ঘাট নৌপাওঁতেই বেলি ডুবা নাৱৰীয়াৰ দৰে হয়৷ তাতে আকৌ যদি গ্ৰেচুইটি,পেন্সন আদি পোৱাত পলম হয় তেনেহলে তেওঁলোকৰ পৰিয়ালৰ অৱস্থা শোচনীয় হৈ পৰে৷ গতিকে দেশৰ জনপ্ৰিয় চৰকাৰে দিনে দিনে সংখ্যা বাঢ়ি গৈ থকা অৱসৰপআপ্ত লোকসকলৰ ক্ষোভৰ দাবানলৰ প্ৰকোপ বৃদ্ধি হবলৈ নিদি তেওঁলোকৰ সমস্যাবোৰ সমাধান কৰা উচিত৷
তথ্যসূত্ৰঃ
1)dignitylifestyle.org
3)money.usnews.com
5)Payment of gratuity act,1972
যুগল চন্দ্ৰ বৰা
শেহতীয়া উন্নীতকৰণ: : 5/2/2020
© C–DAC.All content appearing on the vikaspedia portal is through collaborative effort of vikaspedia and its partners.We encourage you to use and share the content in a respectful and fair manner. Please leave all source links intact and adhere to applicable copyright and intellectual property guidelines and laws.
RELATED ITEMS
চাকৰি বিচাৰোতে জানিবলগীয়া কিছু কথা
চাকৰি বিচাৰোতে জানিবলগীয়া কিছু কথা
‘এন পি এছ’ ৰ আঁচনিৰে অৱসৰৰ পৰিকল্পনা কৰিবলৈ যাওঁতে
‘এন পি এছ’ ৰ আঁচনিৰে অৱসৰৰ পৰিকল্পনা কৰিবলৈ যাওঁতে
চাকৰি নে ব্যৱসায়
চাকৰি নে ব্যৱসায়
অৱসৰ কালৰ খৰচ উলিয়াম কেনেকৈ?
অৱসৰ কালৰ খৰচ উলিয়াম কেনেকৈ সেই বিষয়ে ইয়াত দিয়া হৈ...
