আজিৰ ভোগবাদী সমাজ জীৱনত মানুহৰ কৰ্মব্যস্ততা বাঢ়িলেও বিজ্ঞান আৰু প্ৰযুক্তিবিদ্যাই আমাৰ জীৱনটোক অতি সহজ আৰু আৰামদায়ক কৰি তুলিছে। গতিকে শাৰীৰিক পৰিশ্ৰম কমি যোৱাৰ বাবে আজিকালি মানুহৰ মাজত মেদবহুলতাই এটা ডাঙৰ সমস্যা হিচাপে দেখা দিছে। বৰ্তমান এই মেদবহুলতাৰ পৰা শিশুসকলো সাৰি যোৱা নাই। কাৰণ লগৰীয়াৰ লগত দৌৰি ঢাপৰি প্ৰাকৃতিক পৰিৱেশত খেলা-ধূলা কৰা শিশু আজি বন্ধ কোঠাত ভিডিঅ’ গেম, কাৰ্টুন চাই অকলশৰে সময় পাৰ কৰিছে। আনফালে আধুনিক যুগৰ পৰিৱৰ্তিত সমাজৰ লগত খোজ মিলাই নিজৰ জীৱনধাৰাৰ মান অধিক উন্নত কৰিবলৈ ধনৰ পিছে পিছে ঘূৰি ফুৰোতে প্ৰায়ভাগ লোকেই নিসংগ আৰু আত্মকেন্দ্ৰিক হৈ পৰিছে। ফলত এই প্ৰতিযোগিতাপূৰ্ণ পৃথিৱীত মানুহে যিকোনো বস্তু বিচৰা মতে নাপাই মানসিকভাৱে ভাগি পৰে আৰু মানসিক অন্তৰ্দ্বন্দ্বত ভোগে। বহুতে আকৌ অত্যন্ত সুখ-স্বাচ্ছন্দ্যৰ মাজত থাকিও নিসংগভাৱে দিন কটাবলগীয়া হোৱাত মনৰ আনন্দ, সুখ-শান্তি হেৰাই গৈ মানসিক চাপত আক্ৰান্ত হৈ হতাশাত ভোগে। ফলত শৰীৰটোক নানা ৰোগে সহজে আক্ৰমণ কৰে।
প্ৰকৃতাৰ্থত সু-স্বাস্থ্য আৰু সুখ মানৱ জীৱনৰ বাবে বৰ দৰকাৰী, সেয়েহে ইতিবাচক চিন্তাৰে মন ভৰাই ৰাখি মানসিক চাপৰ পৰা নিজকে বচাই ৰাখিবলৈ চেষ্টা কৰিলে জীৱনটো স্বাস্থ্যৱান হোৱাৰ লগতে আনন্দ আৰু আত্মসন্তুষ্টিও পোৱা যায়।
অত্যধিক মেদবহুলতা আৰু আৰামদায়ক সা-সামগ্ৰীৰ ব্যৱহাৰ আৰু শাৰীৰিক পৰিশ্ৰমৰ অভাৱৰ বাবে মধুমেহ, উচ্চ ৰক্তচাপ, অত্যধিক ক’লেষ্টেৰল হোৱা আদি ৰোগে সমগ্ৰ বিশ্বতে ছুনামিৰ ৰূপ ধাৰণ কৰিছে। তদুপৰি হৃদৰোগৰ ব্যাপকতাও ইয়াৰে এটা ডাঙৰ কাৰণ বুলি ধৰিব পাৰি। সেই কাৰণে আমি জীৱনধাৰা পৰিৱৰ্তন কৰি এটা সুন্দৰ স্বাস্থ্যসন্মত জীৱন প্ৰণালী বাছি ল’লে ওপৰোক্ত ৰোগসমূহক প্ৰতিৰোধ কৰাত যথেষ্ট সহায়ক হ’ব। আনহাতে নিয়মীয়া স্বাস্থ্য পৰীক্ষা কৰাটোও অতি জৰুৰী। এনে স্বাস্থ্য পৰীক্ষাই আমাৰ দেহৰ নানা ৰোগ প্ৰাৰম্ভিক অৱস্থাতে ধৰা পেলাই চিকিৎসাৰ দ্বাৰা এক সুস্থ জীৱন দিব পাৰে। সেইবাবে আমি দৈনন্দিন কৰ্মব্যস্ততাৰ মাজতো কিছু সময় উলিয়াই সু-স্বাস্থ্যৰ অধিকাৰী হ’বলৈ যত্ন কৰিব লাগে।
এলাহ হৈছে মানৱ জীৱনৰ আটাইতকৈ ডাঙৰ শত্ৰু, এলাহ ত্যাগ কৰি পুৱা প্ৰায় আধা ঘণ্টা সময় খোজ কাঢ়িলে দেহ আৰু মন সজীৱতাৰে ভৰি আহে। সময়ৰ নাটনি হ’লে গধূলি সময়তো দ্ৰুতগতিৰে খোজ কঢ়াৰ অভ্যাস কৰিলে শৰীৰৰ অত্যধিক ওজন আৰু মেদবহুলতা বহু পৰিমাণে হ্ৰাস পায়। তদুপৰি এনেদৰে খৰকৈ খোজ কাঢ়িলে সমগ্ৰ শৰীৰটো সঞ্চালিত হৈ শৰীৰৰ বিভিন্ন অংশলৈ অক্সিজেন সৰবৰাহ হোৱাৰ বাবে হৃদযন্ত্ৰ সক্ৰিয় হৈ উঠাৰ ফলত শাৰীৰিক আৰু মানসিকভাৱেও সুস্থ আৰু সবল অনুভৱ কৰা যায়। খোজ কঢ়াৰ বাদেও যোগাসন, ব্যায়াম, ধ্যান অথবা নিজৰ ঘৰুৱা বাগিচাখনতে ফুলগছ ৰোৱা বা বেলকনিৰ টাববোৰৰ যতন লোৱা, ৰং কৰা বা ঘৰুৱা আন যাৱতীয় কাম-কাজ কৰিও শাৰীৰিক শ্ৰম কৰিব পাৰে। ওজন কমাই শৰীৰৰ শোভনীয়তা অটুট ৰাখিবলৈ এৰবিক্ছ, জগিং, চাইক্লিং, সাঁতোৰ বা দৌৰাত অসুবিধা নাথাকিলে অলপ সময় দৌৰিলে মানসিক অৱসাদো দূৰ হোৱাত সহায় হয়।
শৰীৰটোক নানা ৰোগৰ পৰা বচাই ৰাখিবৰ বাবে স্বাস্থ্যসন্মত সুষম আহাৰ সঠিক সময়ত গ্ৰহণ কৰিলেও বহু উপকৃত হ’ব পাৰি। তেল, চৰ্বি আৰু মছলাযুক্ত আহাৰ কম পৰিমাণে লৈ সতেজ শাক-পাচলি, চালাড, ফল-মূল আদি বেছিকৈ খাব লাগে। ফাষ্ট ফুড, জাংক ফুড খোৱা উচিত নহয়। ৰাসায়নিক দ্ৰব্য মিহলোৱা শীতল পানীয় পৰাপক্ষত নোখোৱাই ভাল। এইবোৰ খাদ্যই দৰাচলতে শৰীৰৰ বহু ক্ষতি কৰে। তেজত ক’লেষ্টেৰলৰ মাত্ৰা বঢ়াই দেহৰ ওজন বৃদ্ধি কৰাৰ বাদেও মধুমেহ, হৃদৰোগ, উচ্চ ৰক্তচাপ ৰোগৰ সৃষ্টি কৰিব পাৰে।
ইয়াৰ উপৰি বিশেষজ্ঞসকলৰ মতে, হৃদৰোগৰ আন এটা প্ৰধান কাৰণ হৈছে ধুমপান বা ধঁপাত সেৱন, গুটখা, ধঁপাতযুক্ত সুগন্ধি পাণ-মছলা ব্যৱহাৰৰ অভ্যাসে শৰীৰত হৃদৰোগ, কৰ্কট ৰোগ আদিৰ দৰে নানা ৰোগৰ সৃষ্টি কৰিব পাৰে। অত্যন্ত ধুমপান বা ধঁপাতৰ ব্যৱহাৰৰ বাবে হাৰ্ট এটেক হোৱাৰ সম্ভাৱনাকো নুই কৰিব নোৱাৰি।
শেষত ইয়াকে ক’ব পাৰি যে মানৱ জীৱন বৰ সুন্দৰ আৰু অনুপম। গতিকে স্বাস্থ্যৰ চাবি-কাঠি যেতিয়া আমাৰ হাততেই, সেইবাবে কোনো ৰাগিয়াল বস্তুৰ প্ৰতি আসক্ত নহৈ মানসিক চাপ ত্যাগ কৰি উপযুক্ত পৰিশ্ৰম আৰু ব্যায়ামৰ দ্বাৰা বিভিন্ন জীৱনশৈলীজনিত ৰোগ প্ৰতিৰোধ বা নিয়ন্ত্ৰণ কৰিবলৈ প্ৰয়াস কৰা উচিত।
লেখিকাঃ দীপাঞ্জলি ভট্টাচাৰ্য, অসম বাণী।
শেহতীয়া উন্নীতকৰণ: : 3/19/2020
“আন্তৰ্জাতিক মাতৃভাষা দিৱস”ৰ প্ৰয়োজনীয়তাৰ বিষয়ে
খাদ্য সংৰক্ষণ- প্ৰয়োজনীয়তা আৰু গ্ৰহণ কৰিবলগীয়া সাৱ...
খাদ্য, সোৱাদ আৰু ৰসায়ন প্ৰ’টিনৰ প্ৰয়োজনীয়তা
অসমত ঘাঁহশস্যৰ প্ৰয়োজনীয়তা আৰু সম্ভাৱনীয়তা